വാക്കുകൾക്ക് വിവരിക്കാൻ കഴിയുന്നതിനപ്പുറമാണ് അനുഭവിച്ച വേട്ടയാടലിൻ്റെ ക്രൂരത: പരോക്ഷ മറുപടിയുമായി വീണാ ജോർജ്

കൊച്ചി: മന്ത്രിയായിരിക്കെ നേരിട്ട വേട്ടയാടലുകൾ ചൂണ്ടിക്കാണിച്ച് ആരോ​ഗ്യമന്ത്രി കെ മുരളീധരന് പരോക്ഷ മറുപടിയുമായി മുൻ മന്ത്രി വീണാ ജോർജ്. വാക്കുകൾക്ക് വിവരിക്കാൻ കഴിയുന്നതിനപ്പുറമാണ് അനുഭവിച്ച വേട്ടയാടലിന്റെ ക്രൂരത എന്ന് ചൂണ്ടിക്കാണിച്ചാണ് വീണ ജോർജ് തനിക്ക് നേരിടേണ്ടി വന്ന അനുഭവങ്ങൾ ഓരോന്നായി പറഞ്ഞിരിക്കുന്നത്. വ്യക്തിയധിക്ഷേപം, കായികാക്രമണം, സൈബർവേട്ട, കള്ളപ്രചരണങ്ങൾ, വീട്ടിൽ കയറി റീത്തു വെയ്ക്കൽ, വീട്ടിൽ ശവപ്പെട്ടി കൊണ്ടുവെയ്ക്കൽ വാക്കുകൾക്ക് വിവരിക്കാൻ കഴിയുന്നതിനപ്പുറമാണ് അനുഭവിച്ച വേട്ടയാടലിന്റെ ക്രൂരത. കൃത്യമായ അജണ്ടയോടെയുള്ള ആക്രമണം. പക്ഷെ തളരാൻ കഴിയുമായിരുന്നില്ല എന്നാണ് ഫേസ്ബുക്കിൽ പങ്കുവെച്ച പോസ്റ്റിൽ വീണാ ജോർജ് കുറിച്ചിരിക്കുന്നത്.

രോഗങ്ങൾക്കും ചികിത്സാരംഗത്തെ ഭരിച്ച ചെലവുകൾക്കും മുന്നിൽ നിസ്സഹായരായി പോയേക്കാവുന്ന ലക്ഷക്കണക്കിന് ആളുകൾക്കായി സർക്കാർ നയങ്ങൾക്കനുസൃതമായി കഴിയുന്നതിനപ്പുറം കഠിനാധ്വാനം ചെയ്തു. ഒറ്റവാക്കിൽ തീരുന്നതല്ല ഒന്നുമെന്നും വീണാ ജോർജ് ഫേസ്ബുക്കിൽ കുറിച്ചു. കല്ലേറ് കൊള്ളാൻ വിധിക്കപ്പെട്ട വകുപ്പാണ് ആരോ​ഗ്യ വകുപ്പെന്ന നിലയിൽ മന്ത്രി കെ മുരളീധരൻ നേരത്തെ നടത്തിയ അഭിപ്രായ പ്രകടനത്തോടായിരുന്നു വീണാ ജോ‍ർജിൻ്റെ പരോക്ഷ മറുപടി.

നേരത്തെ കല്ലേറ് കൊള്ളാൻ വിധിക്കപ്പെട്ട വകുപ്പാണ് ആരോ​ഗ്യ വകുപ്പെന്നും ചുമതല ഏറ്റെടുക്കുമ്പോഴാണ് പ്രയാസം മനസിലാക്കിയതെന്നും ആരോ​ഗ്യ മന്ത്രി കെ മുരളീധരൻ നേരത്തെ പ്രതികരിച്ചിരുന്നു. കല്ലെറിയുന്നവർക്ക് സുഖമാണ്. കഴിഞ്ഞ പത്ത് വർഷം താനും കല്ലെറിഞ്ഞതാണ്. ഇപ്പോൾ തിരിച്ച് കിട്ടുമ്പോഴാണ് അതിൻ്റെ പ്രയാസം മനസ്സിലാകുന്നതെന്നും കെ മുരളീധരൻ പറഞ്ഞിരുന്നു. തിരുവനന്തപുരം മെഡിക്കൽ കോളേജിൽ നടന്ന ബിരുദദാന ചടങ്ങിൽ സംസാരിക്കുകയായിരുന്നു മന്ത്രി.

വീണാ ജോർജിൻ്റെ ഫേസ്ബുക്ക് പോസ്റ്റിൻ്റെ പൂർണ്ണരൂപം

വ്യക്തിയധിക്ഷേപം,

കായികാക്രമണം,

സൈബർവേട്ട,

കള്ളപ്രചരണങ്ങൾ,

വീട്ടിൽ കയറി റീത്തു വെയ്ക്കൽ,

വീട്ടിൽ ശവപ്പെട്ടി കൊണ്ടുവെയ്ക്കൽ.

വാക്കുകൾക്ക് വിവരിക്കാൻ കഴിയുന്നതിനപ്പുറമാണ് അനുഭവിച്ച വേട്ടയാടലിന്റെ ക്രൂരത.

കൃത്യമായ അജണ്ടയോടെയുള്ള ആക്രമണം.

പക്ഷെ തളരാൻ കഴിയുമായിരുന്നില്ല .

രോഗങ്ങൾക്കും ചികിത്സാരംഗത്തെ ഭരിച്ച ചെലവുകൾക്കും മുന്നിൽ നിസ്സഹായരായി പോയേക്കാവുന്ന ലക്ഷക്കണക്കിന് ആളുകൾക്കായി സർക്കാർ നയങ്ങൾക്കനുസൃതമായി

കഴിയുന്നതിനപ്പുറം കഠിനാധ്വാനം ചെയ്തു.

ഒറ്റവാക്കിൽ തീരുന്നതല്ല ഒന്നും.

Content Highlights: Veena George has indirectly responded to the alleged harassment she faced, stating that the cruelty of the ordeal goes beyond what words can describe